સોદાગર હંસાજી

વનમાં તેં મેલી મુંને એકલી રે વણઝારા ! જી હો ! મુંને મેલી મત જાજે બાળા વેશમાં સોદાગર હંસાજી. કાગળ જેસી કોથળી રે વણઝારા ! જી હો ! એને ગળતાં નૈ લાગે વાર રે સોદાગર હંસાજી. ડુંગર માથે દેરડી રે વણઝારા ! જી હો ! હું તો ચડી જાઉં તારી વાટ રે સોદાગર હંસાજી. ફાલી ફૂલી રે ઓલી પીપળી રે વણઝારા ! જી હો ! ઓલી ફળ વિના ઝૂલે નાગરવેલ રે સોદાગર હંસાજી. આંબો જાણીને મેં તો સેવિયો રે વણઝારા ! જી હો ! એ તો કરમે ઊગ્યો છે ભંસૂર રે સોદાગર હંસાજી. હીરા માણેકની કોટડી રે વણઝારા ! જી હો ! મને વેપારી મળ્યા સવા લાખના સોદાગર હંસાજી. કાજી મહમદશાની વિનતિ રે વણઝારા ! જી હો ! તમે માની લિયો ગરીબનવાજ રે સોદાગર હંસાજી.