હંસા રે રાજા રહી જાવ આજની રાત

હંસા રે રાજા રહી જાવ આજની રાત, હે મારે કરવી છે મનડાની વાત-હંસા રે૦ પહેલો રે વિસામો હંસા ઘરને ઉંબરીએ, બીજો વિસામો ઝાંપા બ્હાર-હંસા રે૦ ત્રીજો રે વિસામો હંસા ગામને ગોદરિયો, ચોથો વિસામો સ્મશાન-હંસા રે૦ ચાર ચાર જણા હંસા ઊંચકીને ચાલ્યા ભાઇ, પાંચમો કરે છે પોકાર-હંસા રે૦ ગાડું ભરીને સૂકાં લાકડાં રે લીધાં ભાઇ, કોરી હાડલીમાં લીધા અંગાર-હંસા રે૦ સ્મશાન જઇને હંસા ચેહ રે ખડકી, જમણે અંગૂઠે મેલી આગ-હંસા રે૦ મા અને માસી એ બેઉ બેનડી, ઝાંપલા સુધી એનો સાથ-હંસા રે૦ ઘરની સ્ત્રીઓ તો ખૂણે જઇ બેઠી ભાઇ, ખોળિયાની થઇ ગઇ છે રાખ-હંસા રે૦